TRAVERS, AVERT, NOV
Sco baselgia cristiana ans essan nus obligads a l’Evangeli en pled ed acziun. Nus vivain cretta, speranza ed amur, nus dain pais a toleranza e solidaritad, dentant er a l’atgna respunsabladad e libertad. Nus na conuschain nagina separaziun tranter spirituals e laics. Reverendas d’omaduas schlattainas han ils medems dretgs en nossa baselgia.
Evangelic-refurmà. «Evangelic» ans numnain nus damai che l’Evangeli sulet è decisiv per nus, e «refurmà», damai che nus derivain da la Refurmaziun. Ensemen cun ils Lutherans, ils Anglicans e las Baselgias libras essan nus ils «Protestants» tranter ils Cristians. Cun 64‘000 commembers essan nus la segund-gronda cuminanza religiusa en il Chantun.
Nus essan deliberads da confess, n’essan dentant betg senza confess. Quai deriva da las veglias dispittas da direcziun che avessen bunamain stgarpà dapart la societad. «deliberà da confess» vul dir ch’i na dovra betg in confess da cretta obligant per esser commember da la cuminanza. Indiscutabel è dentant: Sco norma vala l’Evangeli. Texts centrals en la veta da cretta èn per exempel il «Bab noss», ils diesch cumandaments, las glorificaziuns e l’apostolicum.