INSPIRAZIUN PER IL MINTGADI
Dumengia damaun, a las 10.00 – u er la dumengia saira u la gievgia da mezdi: En il servetsch divin po noss’olma respirar da nov. Igl è ina maschaida viva d’urar e tedlar, quietezza, musica e chant. Tenor la chapientscha evangelica n’è il servetsch divin betg ni ina «one-(wo)man-show» ni in pled da la dumengia. El smatga nus en il mintgadi, en l’acziun. Da mintga servetsch divin urain nus il «Bab noss», ed a la fin rugain nus da Dieu la benedicziun per tuts.
Servetschs divins èn multifars. Dasper il servetsch divin da pregia datti er il servetsch divin festiv, quel da la sontga Tschaina, quel sin l’alp, quel da la benediziun u il servetsch divin da Taizé. Nus concepin cun pled, musica e cun furmas da dialog. Dentant er cura che uffants vegnan battegiads, giuvenils confirmads, pèrs copulads u ch’i vegn prendì cumià da defuncts, è quai integrà en in servetsch divin.
Cura ch’i vegn celebrà en Vossa plaiv in servetsch divin As infurmescha la stgaffa da publicaziuns davant la baselgia. Igl è er publitgà en il chalender d’occurrenzas regiunal e chantunal, u er en las paginas da las plaivs da la gasetta «reformiert.Bündner Kirchenbote». Las plaivs èn respunsablas per ils servetschs divins. En ils ospitals e las clinicas, en chasas da vegls e da tgira, en las chasas dals Servetschs psichiatrics ed en l’execuziun giudiziala datti agens servetschs divins. Er per geniturs che han perdì in uffant datti celebraziuns spezialas, plinavant per umans senza surds e per umans cun in impediment.